ปาฏิหิเรหิ’เนเกหิ , เตหิ โส ปีณิโต ปุน;

มหาราชา มหาโพธิํ, มหารชฺเชน ปูชยิฯ

[60]

มหาโพธิํ มหารชฺเช-นาภิสิญฺจิย ปูชยํ;

นานาปูชาหิ สตฺตาหํ, ปุน ตตฺเถว โส วสิฯ

[61]

อสฺสยุชสุกฺกปกฺเข, ปนฺนรสอุโปสเถ;

อคฺคเหสิ มหาโพธิํ, ทฺวิสตฺตาหมจฺจเย ตโตฯ

[62]

อสฺสยุชกาฬปกฺเข, จตุทฺทสอุโปสเถ;

รเถ สุเภ ฐเปตฺวาน, มหาโพธิํ รเถสโภฯ

[63]

ปูเชนฺโต ตํ ทินํเยว, อุปเนตฺวา สกํ ปุรํ;

อลงฺกริตฺวา พหุธา, กาเรตฺวา มณฺฑปํ สุภํฯ

[64]

กตฺติกสุกฺกปกฺขสฺส, ทิเน ปาฏิปเท ตหิํ;

มหาโพธิํ มหาสาล-มูเล ปาจินเต สุเภฯ

[65]

ฐปาเปตฺวาน กาเรสิ, ปูชา’เนกา ทิเน ทิเน;

คาหโต สตฺตรสเม, วิวเส ตุ นวงฺกิราฯ

[66]

สกิํ เยวอชายิํสุ, ตสฺสา’เนกนราธิโป;

ตุฏฺฐจิตฺโต มหาโพธิํ, ปุน รชฺเชน ปูชยิฯ

[67]

มหารชฺเช’ภิ สิญฺจิตฺวา, มหาโพธิํ มหิสฺสโร;

กาเรสิ จ มหาโพธิ-ปูชา นานปฺปการกํฯ

[68]

อิติ กุสุมปุเร สเรสรํสา,

พหุวิธจารุธชากุลาวิสาลา;

สุรุจิรปวโรรุ โพธิปูชา,

มรุนรจิตฺตวิกาสินี อโหสีติฯ

สุชนปฺปสาทสํเวคตฺถาย กเต มหาวํเส

มหาโพธิคฺคหโณ นาม

อฏฺฐารสโม ปริจฺเฉโทฯ

เอกูนวีสติม ปริจฺเฉท

โพธิ อาคมโน

[1]

มหาโพธิรกฺขณตฺถํ , อฏฺฐารส รเถ สโภ;

เทวกุลานิ ทตฺวาน, อฏฺฐามจฺจา กุลานิ จฯ

[2]

อฏฺฐ พฺราหฺมณกุลานิ, อฏฺฐ วสฺสกุลานิ จ;

โคปกานํ ตรจฺฉานํ, กุลิงฺคานํ กุลานิ จฯ

[3]

ตเถว เปสการานํ, กุมฺภการานเมว จ;

สพฺเพ สญฺจาปิ เสนีนํ, นาคยกฺขานเมว จฯ

[4]

เหมสชฺชุฆเฏเจว, ทตฺวา อฏฺฐฏฺฐ มานโท;

อาโรเปตฺวา มหาโพธิํ, นาวํ คงฺคาย ภูสิตํฯ

[5]

สงฺฆมิตฺต มหาเถรี, สเห กทส ภิกฺขุนิํ;

ตเถวา’โรปยิตฺวาน, อริฏฺฐปมุเขปิ จฯ

[6]

นครา นิกฺขมิตฺวาน, วิญฺชาฏวิมติจฺจโส;

ตามลิตฺถิํ อนุปฺปตฺโต, สตฺตาเหเน’ว ภูปติฯ

[7]

อจฺจุฬา ราหิ ปูชายิ, เทวานาคานราปิ จ;

มหาโพธิํ ปูชยนฺตา, สตฺตาเหน’วุปาคมุํฯ

[8]

มหาสมุทฺทตีรมฺหิ, มหาโพธิํ มหีปติ;

ฐปาเปตฺวาน ปูเชสิ, มหารชฺเชน โส ปุนฯ

[9]

มหาโพธิํ มหารชฺเช, อภิสิญฺจียกามโท;

อคฺคสิร สุกฺกปกฺเข, ทิเน ปาฏิปเท ตโตฯ

[10]

อุจฺจาเรตุํ มหาโพธิํ, เตหิเยว’ฏฺฐ อฏฺฐหิ;

สาลมูลมฺหิ ทินฺเนหิ, ธาตุคฺคตกุเลหิ โสฯ

[11]

อุกฺขิปิตฺวา มหาโพธิํ, คลมตฺตํ ชลํ ตหิํ;

โอคาเหตฺวา สนาวาย, ปติฏฺฐาปยิ สาธุกํฯ

[12]